Listaverkalán

Sjá nánar hér.

Árni Rúnar opnar sýningu í Gallerí Art-Iceland

Laugardaginn 14. apríl 2007

Árni Rúnar Sverrisson er undir sterkum áhrifum frá litbrigðum og formum frumgróðurs jarðar. Á löngum göngum um hálendi Íslands hafa sprottið þessar hugmyndir af svo sérstæðum málverkum Árna. Ef við rýnum niður og dáumst að listaverkinu sem er við fætur okkar þá sjáum við fegurð sem er alveg ótrúleg. Landslag Íslands er ekki eingöngu fallegir fjallstoppar og jöklar. Það er síðast en ekki síst fegurð hins mjúka og smáa sem svo margir ganga yfir en sjá ekki vegna þess að við gleymum að horfa á það sem er næst okkur.

Í myndum Árna koma fyrst og fremst fram hughrif frá náttúrunni. Þessar myndir spegla nokkurs konar ferðalag um heiðalönd, með gróðurbölum, tjörnum, leirbleytu og keldudrögum eða gróðursnauð holt. Þó víða bregði fyrir blákynjuðum tónum í myndunum er það ekki blámi hárra fjalla né stórbrotið landslag sem þarna ráða för, heldur smærri litbrigði jarðarinnar, blæbrigði í grjóti með mosaskófum og fléttum, þessum viðkvæma hálendisgróðri, sem löngum var hér helsti litagjafi til hannyrða og listsköpunar. Árni leikur sér með skuggaskipti á vatnsfleti, stundum kulda og heiðríkju, en í annan stað bregður fyrir dulmagnaðri birtu í holti og mó. Áhorfandinn finnur líka glaða sólskinsstemmningu og káta liti. Áhrifin frá þessari lágstemmdu litasinfóníu vefur Árni fínlega saman í myndrænar heildir á strigaspeldinu.

Myndirnar vekja hughrif, sem minna á gönguferð um eyðilendur, þar sem litir og form raðast í ákveðna hrynjandi í myndrúminu. Þó að litaspilið sé óhlutkennt, finnur horfandinn næstum áþreifanlega fyrir því hvert förinni er heitið. Handan við grágrænan ásinn er kannski skær birta, sólgulir blettir í brekku og bergvatn við gljáðan klettavegg.

Árni hefur víðar leitað fanga við myndmótun sína en í íslenskri náttúru. Hann var um tíma upptekinn af ýmiskonar togstreitu í mannlífinu, svo sem stríðsátökum, sem voru býsna nærri okkur á síðasta áratug tuttugustu aldar, meðan mest gekk á á Balkanskaga. Áhrif frá þessum blóðugu átökum skiluðu sér í nokkrum mynda Árna frá þessum tíma. Sumar þeirra voru beinlínis hrópandi, líkt og opin und, jafnvel óþægilegar. En hann hefur í seinni tíð lagt meira upp úr kyrrlátari átökum, litaspili í umhverfi okkar. Átökin felast nú fremur í dulmögnun litatónanna innan myndrammans. Þau eru miklu fremur undir áleitnum áhrifum frá margbreytileika náttúrunnar en áreiti stundlegra atburða.

Nýjar greinar á Art-Iceland.com

Listaverkalán
Listaverkalán er frábær kostur sem listunnendur geta notfært sér. Hægt er að kaupa hvers konar listaverk og listmuni sem galleríið býður upp á.

Opnun á gallerí bláskjár á Egilsstöðum
Gallerí Bláskjár á Egilsstöðum er eina galleríið á Austurlandi og það sérhæfir sig í að koma verkum listamanna sem eru fæddir eða búsettir á Austurlandi, á framfæri. Þar má finna málverk, grafíkmyndir, þrívíð verk og vídeolist.

Dýrið í mér, vetrarhátíð í Reykjavík 2007
Sýningin sýnir að allir sem eru menningarlega sinnaðir eiga erindi erindi austur á hérað að kynnast betur frábærum listamönnum sem eru að gera skemmtilega hluti og er vel þess virði að leggja á sig að fara þangað á sýningar og menningarviðburði.

Ný málverk, Kjartan Guðjónsson og Sigurður Örlygsson
Vetrarhátíð í Reykjavík er orðin fastur liður í menningarlífi Reykavíkur. Hátíðin var haldin dagana 22.-24. febrúar. Í tilefni af Vetrarhátíð og Safnanótt í Reykjavík sýna Kjartan Guðjónsson og Sigurður Örlygsson Ný málverk í galleríinu Art-Iceland.com frá 23. febrúar -10. mars.

Álfar í mannheimum
Álfheiður Ólafsdóttir sýnir olíumálverk á Thorvaldsen bar 17. febrúar til 31. mars 2007.
Thorvaldsenbar er vinalegur bar í Austurstræti. Hann er skemmtilega innréttaður og er vel til þess fallinn að vera með myndlistasýningar. Þar er hægt að fá sér góðan mat á daginn og skemmta sér með lifandi tónlist á kvöldin, fram eftir nóttu.

Ólátagarður
Vetrarhátíð í Reykjavík 2007 - Kartöflugeymslunni í Ártúnsbrekkunni.
Njóttu hreyfilistarinnar, njóttu ljósmyndanna og dáðstu að málverkunum. Ekki láta neitt fram hjá þér fara, ekki einu sinni haugana vítt og breitt um rýmið sem allir bera vitni um núverandi stöðu listformsins. Tylltu þér á bekkina og fylgstu með öðrum gestum njóta sýningarinnar.

Íslensk List - Ljós og Lifandi

Skólavörðustíg 1A

562 2890 / 698 2919