List barna - akríl
Þú þarft ekki alltaf að nota pensil til að mála mynd. Það má líka breyta til og
sleppa penslunum
! Akríl litir eru sérstaklega
þægilegir þegar við viljum láta litina ráða ferðinni.
Undirbúningur: Skerið niður karton. Það þarf að vera þykkt
og sterkt. Síðan er strigi límdur ofan á kartonið. Það er mjög
gott að pensla lími ofan á strigann aukalega. Þá rennur liturinn
betur. Þetta er látið þorna.
Ég nota akrílmálingu og þynni hana aðeins með vatni. Þægilegt er að
nota LGG flöskur og hrista saman litinn og vatnið. Þegar blandan er
tilbúin þá hellum við úr flöskunni ofan á strigan og veltum
spjaldinu til og frá. Þá er tekinn annar litur og sá litur rennur
saman við fyrri litinn. Þeir fara í “ferðalag” saman og er ótrúlegt
hvað verða til skemmtilegar myndir. Það er ótakmarkað hvað má dunda
sér lengi í þessu verkefni. En passið bara að setja ekki of mikinn
lit í einu og ekki blanda of mörgum litum saman.
Hvetjið börnin til að segja frá hvað þau sjá út úr myndunum. Þið
verðið ekki fyrir vonbrigðum.
Það má gjarnan hafa það í huga að þessi leikur er ekki síður fyrir
eldri börn og fullorðna.
Þessar litlu myndir má nota sem boðskort, eða setja þau í ramma upp
á vegg.
Sjálf bjó ég til svona kort og notaði sem boðskort fyrir fermingu
sonarins.
Ef eitthvað rennur út fyrir strigann þá er það allt í lagi. Þá
breytum við bara dropanum í einhverja fígúru eða málum ramman sem er
utan um, allt eftir smekk hvers og eins.
Góða skemmtun !
Álfheiður Ólafsdóttir
|
