List barna - vetrarmyndir
Vetrarmyndir:
Að vinna með veturinn er óþrjótandi verkefni. Okkur langaði að búa
til þrívíðar vetrarmyndir. Til þess að koma þrívíðri mynd fram, þá
völdum við þykkt undirlag og pappír sem leggst ekki niður og er
lifandi.
Undirbúningur:
Í þetta sinn datt okkur í hug að klippa út karton úr haframjölspakka
og bylgjupappír sem undirlag. Klipptum kreppappír í ræmur og
völdum okkur gott föndurlím. Um haustið þurrkuðum við lauf
sem komu sér vel í þessu verkefni.
Við töluðum um snjóinn og hvað það er skemmtilegt að leika sér í
honum. Ég fann til hvítan, dökkbláan og ljósfjólubláan kreppappír.
Kreppappír hefur þann eiginleika að
myndirnar verða lifandi og skemmtilegar. Það er auðvelt að sjá út
úr þessum myndum mikinn snjó og skafla. Vegna þess að
pappírinn leggst ekki alveg niður myndast þrívíð tilfinning.
Krakkarnir skemmtu sér við
að búa til sögur: Allt í einu hvesssti, þá fuku lauf af trjánum og
lentu á sköflunum okkar.
Við lékum okkur að því að elta laufin og renna okkur á sleðum niður
brekkurnar.
Vetrarmyndirnar bera þess greinileg merki að hugmyndaflug barnanna
ræður för. Verkin verða fersk og frumleg og skapa grundvöll fyrir
þroskandi umræður.
Álfheiður Ólafsdóttir
|
