Keilir

Snemma árs 1995 hóf ég að vinna myndverk sem ég kallaði Tindaseríur, þriggja mynda verk sem byggja á formi þríhyrnings. Fjallið Keilir er kveikjan að þessu viðfangsefni. Ég keyri oft Suðurgötuna og þá blasir Keilir við í mismunandi birtu. Þessi sýn greiptist í hugan og varð svo til þess einn daginn á vinnustofunni að ég gerði minn fyrsta tind.

Haustið 1995 hóf ég svo nám í raftónlist í Tónveri Tónlistarskóla Kópavogs þar sem ég vann áfram með þríhyrningsformið í tónlist.

1999 gaf ég út í tilefni aldamótanna CD 3 pýramídar. Tónlistin skiptist í þrjá jafnlanga þætti; Framtíð, Nútíð, Fortíð. Þættirnir eru sjálfstæðir á geisladiskinum en síðan blandað saman í nokkrum útgáfum. Næsta glíma mín við þríhyrningsformið varð að einkasýningu í Ráðhúsi Reykjavíkur 2004, þar á meðal 6 olíumálverk (160cm x 125cm) þar sem tindurinn er úr plexigleri sem ég málaði á með mismunandi hætti. Á sýningunni var myndband til sýnis (flug yfir Kverkfjöllum í Vatnajökli) við tónlist af 3 pýramídum.

En til að fullgera “conseptið” fannst mér að ég yrði að gera myndband af Keili. Það var svo síðsumars að kvikmyndagerðarmaðurinn Jón Þór Víglundsson tók myndbandið sem hér má sjá. Á helikopter var flogið eftir veginum sem leið liggur í átt að Keili og svo flogið yfir hann.

Það er trú mín að leiðin að Keili sé ein sú fallegasta á Reykjanesinu. Ég hef verið að reyna að vekja athygli á þessu hjá forstöðumönnum Hitaveitu Suðurnesja sem á Keili með það í huga að Keilir geti orðið næsta ævintýri á Reykjanesskaga á eftir Bláa lóninu sem hinn náttúrlegi íslenski pýramídi “The Natural Pyramid of Iceland”. Fyrir ferðamenn í stuttum stansi er Keilisleiðin fljótlegasta og fallegasta leiðin til að kynnast ósnortinni íslenskri náttúru þar sem hinn mistíski pýramídi Keilir dansar fyrir augunum í hrikalegu hrauninu. Því þarf að passa upp á að frekari framkvæmdir á þessu svæði verði ekki til að eyðileggja þá möguleika sem þarna felast.


Jóhann G. Jóhannsson

Keilir

Keilir fríður kennast skal,
Knappt þó skríði runnur,
fagran prýðir fjallasal
Fyrr og síðar kunnur.

Þekkti ég siðinn þann af sjón
Þekktan liði drengja
Keilir við um flyðrufrón
Fiskimiðin tengja.

Sæfarendur reyna rétt
Rata’ að lending heilir;
Til að benda’ takmark sett
Tryggur stendur Keilir.

Þegar gengið er á Keili er ekið að Höskuldarvöllum þar er ágætt bílastæði við norðurenda Oddafells. Gengið er meðfram Oddafellinu eftir göngustíg að Höskuldarvallarhrauninu en svo nefnist hraunið á milli Höskuldarvalla og Keilis. Fjallið er auðvelt uppgöngu og er aðallega farið upp öxlina að austanverðu. Á hverju ári koma nokkur hundruð manns á Keilistopp og skrifa nafnið sitt í gestabókina sem þar er.